ऑनलाईन रेल्वे तिकीट बुक करताना झालेल्या तांत्रिक त्रुटीचा फायदा घेत सायबर भामट्यांनी एका ज्येष्ठ नागरिकाला तब्बल ६ लाख ७,९३२ रुपयांना चुना लावल्याची धक्कादायक घटना मीरा रोड येथे घडली आहे. एका छोट्याशा चुकीमुळे सेवानिवृत्त वृद्धाला आपले कष्टाचे लाखो रुपये गमवावे लागल्याने परिसरात एकच खळबळ उडाली आहे. याप्रकरणी काशिमीरा पोलीस ठाण्यात गुन्हा दाखल करण्यात आला आहे.
नेमके काय घडले?
मिळालेल्या माहितीनुसार, काशिमीरा येथील डेल्टा गूड्स सोसायटीमध्ये राहणारे ६८ वर्षीय इंद्रकुमार जेटली हे आयआरसीटीसीच्या अधिकृत संकेतस्थळावरून क्रेडिट कार्डद्वारे रेल्वेचे तिकीट बुक करत होते. मात्र, बुकिंग दरम्यान अचानक तांत्रिक अडचण आली. यामुळे त्यांच्या खात्यातून २,०५६ रुपये तर कापले गेले, पण तिकीट बुक झाले नाही.
गुगल सर्च पडले महागात!
कापलेले २,०५६ रुपये परत मिळवण्यासाठी (Refund) जेटली यांनी गुगलवर आयआरसीटीसीच्या कस्टमर केअरचा नंबर शोधला. गुगलवर मिळालेल्या एका बनावट कस्टमर केअर क्रमांकावर त्यांनी संपर्क साधला. समोरील सायबर भामट्याने आयआरसीटीसीचा अधिकारी असल्याचे भासवून जेटली यांचा विश्वास संपादन केला. पैसे परत खात्यात जमा करण्याच्या बहाण्याने आरोपीने जेटली यांना मोबाईलमध्ये एक संशयास्पद ॲप्लिकेशन डाऊनलोड करण्यास भाग पाडले.
अशी झाली ६ लाखांची लूट
जेटली यांनी ते ॲप इन्स्टॉल करताच त्यांच्या मोबाईल स्क्रीनचा संपूर्ण ताबा सायबर चोरट्याकडे गेला. यानंतर भामट्याने जेटली यांच्या बँक खात्याची गोपनीय माहिती चोरून, त्यांच्या खात्यातून परस्पर ६ लाख ७,९३२ रुपये लांबवले. मोबाईलवर पैसे वजा झाल्याचे मेसेज आल्यानंतर आपली फसवणूक झाल्याचे जेटली यांच्या लक्षात आले आणि त्यांनी तातडीने पोलिसांत धाव घेतली.
काशिमीरा पोलिसांत गुन्हा दाखल
आपली फसवणूक झाल्याचे समजताच इंद्रकुमार जेटली यांनी काशिमीरा पोलीस ठाणे गाठून तक्रार दिली. पोलिसांनी अज्ञात सायबर भामट्याविरुद्ध गुन्हा दाखल केला असून, सायबर सेलच्या मदतीने या प्रकरणाचा तांत्रिक तपास सुरू केला आहे.
नागरिकांनी काय काळजी घ्यावी?
आयआरसीटीसी किंवा कोणत्याही बँकेचा कस्टमर केअर नंबर कधीही गुगलवर शोधू नका. अधिकृत वेबसाईटवर दिलेले संपर्क क्रमांकच वापरावेत.
बँक अधिकारी किंवा कस्टमर केअर प्रतिनिधी कधीही कोणतेही ॲप डाऊनलोड करायला सांगत नाहीत.
अनोळखी व्यक्तीने पाठवलेल्या लिंकवर क्लिक करणे किंवा स्क्रीन शेअरिंग ॲप डाऊनलोड करणे तुमच्या बँक खात्यासाठी अत्यंत घातक ठरू शकते.
