“लग्नाला विघ्न अनेक असतात” असं म्हणतात, पण नांदेडच्या माहूर तालुक्यातील लखमापूर येथे निसर्गाने जणू लग्नाची परीक्षेच घेतली. ऐन लग्नाच्या मुहूर्तावर वादळी वाऱ्यासह पावसाने असा काही तांडव केला की क्षणात मांडव उडून गेला. पण जिद्द आणि प्रेमाचा विजय झालाच! छत्रीच्या आडोशाला आणि भर पावसात श्रावणी आणि अर्जुन या जोडप्याची रेशीमगाठ बांधली गेली.
विजांचा कडकडाट अन् मांडवाचा पडदा फाटला!
लखमापूर येथील श्रावणी जाधव आणि माहूरचा अर्जुन राठोड यांचा विवाह सोहळा गुरुवारी दुपारी ठरला होता. नवरी नटून थटून तयार होती, नवरदेव बाशिंग लावून सज्ज होता आणि वऱ्हाडींच्या गप्पा रंगात आल्या होत्या. अक्षता टाकण्यासाठी सगळे सज्ज असतानाच अचानक हवामान बदलले. सोसाट्याचा वारा आणि विजांच्या कडकडाटासह पावसाने जोरदार हजेरी लावली. वाऱ्याचा वेग इतका प्रचंड होता की, क्षणात लग्नाचा मांडव हवेत उडाला आणि वऱ्हाडींची एकच पळापळ झाली.
छत्रीच्या आडोशाला घुमले मंगलाष्टकांचे स्वर
मुहूर्त टळत चालला होता आणि पाऊस थांबण्याचं नाव घेत नव्हता. अशा परिस्थितीत लग्न लावायचं कसं? हा प्रश्न सर्वांसमोर होता. मात्र, दोन्ही कुटुंबांनी हार न मानता पावसातच लग्न लावण्याचा निर्णय घेतला. नवरदेव आणि नवरीच्या डोक्यावर छत्र्या धरून ब्राह्मणांनी मंत्रोच्चार सुरू केले. एका हातात छत्री सावरत आणि दुसऱ्या हाताने विधी करत श्रावणी-अर्जुनने एकमेकांच्या गळ्यात वरमाला घातली.
वरुणराजाच्या अक्षता अन् गावकऱ्यांची साथ
पावसामुळे जेवणाची आणि बसण्याची मोठी गैरसोय झाली, तरीही वऱ्हाडी मंडळींनी काढता पाय घेतला नाही. भर पावसात उभे राहून सर्वांनी या नवदांपत्यावर अक्षता टाकल्या. निसर्गाच्या कोपावर मानवी जिद्दीने मिळवलेला हा विजय सध्या सोशल मीडियावर कौतुकाचा विषय ठरत आहे.
