पुणे महापौर कार्यालयाच्या अधिकृत ई-मेल आयडीवर थेट बॉम्बस्फोटाची धमकी देणारा ई-मेल आल्याने प्रशासन आणि सुरक्षा यंत्रणांमध्ये प्रचंड खळबळ उडाली आहे. या धमकीच्या ई-मेलमध्ये केवळ पुणे महापौर कार्यालयच नाही, तर नागपूरमधील काही अत्यंत महत्त्वाच्या ठिकाणांना आणि राष्ट्रीय स्वयंसेवक संघाच्या (RSS) मुख्यालयाला देखील लक्ष्य करण्याचा दावा करण्यात आल्याने सुरक्षा यंत्रणा कमालीच्या सतर्क झाल्या आहेत.
आयईडी बॉम्बस्फोटाचा उल्लेख; ठराविक तारखांचा संदर्भ
मिळालेल्या प्राथमिक माहितीनुसार, संबंधित ई-मेलमध्ये ‘IED’ म्हणजेच इम्प्रोव्हाइझ्ड एक्सप्लोझिव्ह डिव्हाइसद्वारे बॉम्बस्फोट घडवून आणण्याचा उल्लेख करण्यात आला आहे. धक्कादायक बाब म्हणजे, यामध्ये काही विशिष्ट तारखा आणि वेळांचाही स्पष्ट संदर्भ देण्यात आला आहे. या ई-मेलचे गांभीर्य ओळखून पुणे आणि नागपूरमधील सुरक्षा यंत्रणांनी तातडीने हालचाली सुरू केल्या आहेत.
बीडीडीएस आणि सायबर विभाग अलर्टवर
धमकीचा ई-मेल प्राप्त होताच पुणे पोलीस, बॉम्ब शोधक व नाशक पथक (BDDS) तसेच सायबर विभागाला तात्काळ सतर्क करण्यात आले. हा ई-मेल नेमका कुठून पाठवण्यात आला? त्याचा आयपी (IP) अॅड्रेस काय आहे? आणि या संपूर्ण कटामध्ये कोणाचा हात आहे? याचा शोध घेण्यासाठी तांत्रिक तपास सुरू करण्यात आला आहे.सायबर तज्ज्ञांच्या मदतीने ई-मेलचा मूळ स्त्रोत (Source) शोधण्याचे काम युद्धपातळीवर सुरू आहे. हा ई-मेल खरोखरच एखाद्या दहशतवादी मानसिकतेतून पाठवला आहे की केवळ अफवा आणि दहशत पसरवण्यासाठी रचलेला बनावट (Hoax) संदेश आहे, याचीही चौकशी पोलीस करत आहेत.
संवेदनशील भागांत सुरक्षेत मोठी वाढ
दरम्यान, कोणतीही अनुचित घटना घडू नये यासाठी खबरदारीचा उपाय म्हणून पुणे महापौर कार्यालय, नागपूरमधील महत्त्वाचे सरकारी विभाग आणि रेशीमबागेतील राष्ट्रीय स्वयंसेवक संघाचे मुख्यालय या सर्व परिसरांमध्ये सुरक्षा व्यवस्था कडक करण्यात आली आहे. जागोजागी कडेकोट पोलीस बंदोबस्त तैनात करण्यात आला असून संशयास्पद हालचालींवर बारकाईने लक्ष ठेवले जात आहे. आतापर्यंतच्या तपासणीत कोणतीही संशयास्पद वस्तू आढळून आलेली नाही, अशी माहिती पोलिसांकडून देण्यात आली आहे.
नागरिकांना अफवांवर विश्वास न ठेवण्याचे आवाहन
हा तपास पूर्ण होईपर्यंत आणि सत्य समोर येईपर्यंत नागरिकांनी कोणत्याही सोशल मीडियावरील अफवांवर विश्वास ठेवू नये, तसेच शहरात शांतता राखावी आणि प्रशासनाला सहकार्य करावे, असे आवाहन पोलीस प्रशासनाकडून करण्यात आले आहे. सर्व सुरक्षा यंत्रणा परिस्थितीवर २४ तास बारकाईने लक्ष ठेवून असून नागरिकांच्या सुरक्षेसाठी सर्व आवश्यक ती पावले उचलली जात असल्याचे वरिष्ठ अधिकार्यांनी सांगितले आहे.
