(प्रतिनिधी – प्रियंका बनसोडे) – समृद्धी महामार्गावर पुन्हा एका भीषण अपघाताची घटना घडली आहे. वाशिममध्ये महामार्गावर उभ्या असलेल्या ट्रकला भरधाव कारने धडक दिली. हा अपघात इतका भीषण होता की यामध्ये कारचा चक्काचूर होऊन दोन जणांचा जागीच मृत्यू झाला तर ३ जण जखमी झाले आहेत. मृतांमध्ये वडील आणि मुलाचा समावेश आहे.
मिळालेल्या माहितीनुसार, वाशिममध्ये समृद्धी महामार्गावर सकाळी ११.४५ वाजता हा भीषण अपघात घडला. ट्रकमध्ये बिघाड झाल्यामुळे चालकाने महामार्गावर कडेला ट्रक उभा केला होता. याचवेळी पाठीमागून आलेल्या भरधाव कारने उभ्या असलेल्या ट्रकला जोरदार धडक दिली. वाशिमच्या मंगरूळपीर तालुक्यातील लोकेशन २१८ वर हा अपघात झाला झाला असून या अपघातामध्ये कारमधील दोघांचा मृत्यू झाला तर तिघे जखमी झाले आहेत.
या अपघातामध्ये ४५ वर्षीय वडील आणि ७ वर्षांच्या मुलाचा जागीच दुर्दैवी मृत्यू झाला आहे. तर तिघे जण जखमी झाले असून यामध्ये २ महिला आणि एका पुरूषाचा समावेश आहे. अपघातग्रस्त कार नागपूरवरून मुंबईच्या दिशेने जात असल्याची माहिती मिळत आहे. अपघातामध्ये कारचा अक्षरश: चक्काचूर झाला. अपघाताची माहिती मिळताच वाशिम पोलिस घटनास्थळी हजर झाले. हा अपघात इतका भीषण होता कि, कारचा पुढील भाग कापून त्यानंतर मृतदेह आणि जखमींना बाहेर काढण्यात आले. जखमींना खासगी रुग्णालयात उपचारासाठी दाखल करण्यात आले आहे .
