दारुच्या नशेत भांडणाच्या कारणावरुन तसेच जेवण बनविण्यास नकार दिल्याने वेटरने दुसर्‍या वेटरवर ऊस तोडण्याच्या कोयत्याने मानेवर, हातावर वार करुन जीवे मारण्याचा प्रयत्न केला.
याबाबत आशिक अब्बास अली शेख (वय ३१) यांनी आळंदी पोलीस ठाण्यात फिर्याद दिली आहे. त्यानुसार पोलिसांनी आयुब अब्दुल शेख (वय ३८) याला अटक केली आहे. ही घटना माथेरान हॉटेलमध्ये २४ सप्टेंबर रोजी मध्यरात्री साडेबारा वाजता घडली.
याबाबत पोलिसांनी दिलेल्या माहितीनुसार, विनोद बरकडे यांचे हॉटेल माथेरान आहे. तेथे दोघेही जण वेटर म्हणून कामाला आहेत. हॉटेलमधील फॅमिली रुममध्ये त्यांच्यात दारुच्या नशेत भांडणे झाली. यावेळी फिर्यादी यांनी जेवण बनविण्यास नकार दिला. त्यामुळे आयुब याने आशिक याला शिवीगाळ करुन हाताने मारहाण केली. हॉटेलच्या किचनमध्ये जाऊन ऊस तोडण्याचा कोयता आणून फिर्यादीस तुला आता कायमचाच संपवतो, असे म्हणून कोयत्याने फिर्यादीचे मानेवर, हातावर वार करुन जीवे ठार मारण्याचा प्रयत्न केला. सहायक पोलीस निरीक्षक माळी तपास करीत आहेत.
