(प्रतिनिधी – प्रियंका बनसोडे) – वाहतूक नियमभंग करुन वेडीवाकडी दुचाकी चालवित असल्याने वाहतूक पोलिसांनी त्याला अडविले. त्यातून दुचाकीस्वाराने वाहतूक पोलिसाला शिवीगाळ करुन मारहाण केली. भारती विद्यापीठ पोलिसांनी या दुचाकीस्वाराला अटक केली आहे.
आशीष रामचंद्र चव्हाण (वय ३७) असे अटक केलेल्याचे नाव आहे. याप्रकरणी पोलीस शिपाई दीपक सदाशिव भोईर यांनी भारती विद्यापीठ पोलिसांकडे फिर्याद दिली आहे. ही घटना कात्रज बायपास चौकात शुक्रवारी सकाळी पावणे अकरा वाजण्याच्या सुमारास घडली.
याबाबत पोलिसांनी दिलेल्या माहितीनुसार, दीपक भोईर हे कात्रज बायपास चौकात वाहतूक नियमन करीत होते. त्यावेळी आशीष चव्हाण हा दुचाकी जोराने व वेडीवाकडी चालवत नियमभंग करुन आल्याने भोईर यांनी त्याला थांबविले. त्याच्याकडे लायसन, कागदपत्रे मागितली. तेव्हा त्याने अरेरावी व उद्धट वर्तन करत फिर्यादी यांना हाताने मारहाण केली. फिर्यादी यांच्या डाव्या गुडघ्यावर व कंबरेवर जोरजोराने लाथा मारुन फिर्यादीचे डाव्या गुडघ्याला गंभीर दुखापत केली. फिर्यादी यांना शिवीगाळ करुन त्यांचा शासकीय गणवेशाचा खिसा फाडून जीवे मारण्याची धमकी दिली. पोलिसांनी शासकीय कामात अडथळा आणल्याचा गुन्हा दाखल करुन भोईर याला अटक केली आहे. सहायक पोलीस निरीक्षक शेंडे तपास करीत आहेत.
