महाराष्ट्राच्या राजकारणाच्या पार्श्वभूमीवर मोठी बातमी समोर आली आहे. ४८ तासात भाजपचा नेता निवडीचा निर्णय होणार असल्याची माहिती सूत्रांकडून मिळत आहे. भाजपचे दोन निरीक्षक नेता निवडीसाठी महाराष्ट्रात येणार आहेत, अशी माहिती आता समोर आली आहे.
येत्या २९ तारखेला भाजपची बैठक होणार आहे. या बैठकीत भाजपच्या नेता निवडीचा निर्णय घेण्यात येणार आहे. विशेष म्हणजे एकनाथ शिंदे, अजित पवार आणि भाजप यांची खातीदेखील ठरली आहेत, अशी माहिती मिळत आहे. दरम्यान, एकनाथ शिंदे यांनी आज मुख्यमंत्री पदाचा राजीनामा दिला आहे. नवं सरकार स्थापन होईपर्यंत आणि नव्या मुख्यमंत्र्यांनी शपथ घेईपर्यंत ते राज्याचे काळजीवाहू मुख्यमंत्री राहणार आहेत. राज्यात पुढच्या ४८ तासात केंद्रीय मंत्री अश्विनी वैष्णव यांच्यासह भाजपचे २ निरीक्षक महाराष्ट्रात येणार आहेत. देवेंद्र फडणवीस महाराष्ट्राचे मुख्यमंत्री होणार यावर शिक्कोर्तब झाल्याची माहिती सूत्रांनी दिली आहे. फडणवीसांच्या मुख्यमंत्रीपदाला भाजपच्या सर्व आमदारांचा पाठिंबा आहे. सूत्रांनी दिलेल्या माहितीनुसार, एकनाथ शिंदे यांच्याकडे नगरविकास खातं जाणार आहे तर अजित पवार यांच्याकडे अर्थ खातं जाणार आहे. तर देवेंद्र फडणवीस यांच्याकडे गृह मंत्रालय राहणार आहे.
दरम्यान, शिवसेना नेते गुलाबराव पाटील यांनी यावर प्रतिक्रिया दिली आहे. “मुख्यमंत्रीपदाचा निर्णय एकनाथ शिंदे आणि महायुतीमधील प्रमुख नेते घेतील. एकनाथ शिंदे जो निर्णय घेतील तो आम्हाला मान्य आहे. आम्ही सर्व अधिकार एकनाथ शिंदे यांना दिले आहेत. त्यामुळे एकनाथ शिंदे जो निर्णय घेतील तो मान्य आहे”, अशी प्रतिक्रिया गुलाबराव पाटील यांनी दिली.
