राज्यात सत्तास्थापनेच्या हालचालींना वेग आला आहे. राज्यातील रणधुमाणी आता काही प्रमाणात शांत झाली आहे.अशातच आज राज्याचे उपमुख्यमंत्री अजित पवार हे महाराष्ट्राचे माजी मुख्यमंत्री यशवंतराव चव्हाण यांच्या समाधीस्थळी पोहोचले. तिथेच रोहित पवार आणि अजित पवार या काका पुतण्यांची भेट झाली. अजित पवारांनी मिश्किल शब्दांत पुतण्या रोहित पवार यांना टोला लगावला आहे. सध्या अजितदादा आणि रोहित पवारांची हे भेट चर्चेचा विषय ठरत आहे.
यशवंतराव चव्हाण यांच्या समाधीचे दर्शन घेण्यासाठी राष्ट्रवादी काँग्रेसच्या दोन्ही गटातील नेते कराडला पोहोचले आहे. शरद पवार यांच्यासोबत निलेश लंके, रोहित पवार, बाळासाहेब पाटील, श्रीनिवास पाटील हेदेखील पोहोचले होते. तर, अजित पवार देखील समाधी दर्शनासाठी कराडला पोहोचले आहेत. तिथेच त्यांची भेट रोहित पवार यांच्यासोबत झाली. यावेळी दोघांमध्ये संवादही झाला. अजित पवार समोर येताच रोहित पवार राजकीय वैर विसरत आपले काकांच्या म्हणजेच अजित पवारांच्या पाया पडले. तर अजित पवारांनीही काकाचं दर्शन घे असं म्हंटलं. याच भेटीदरम्यान ‘माझी सभा झाली असती तर काय झालं असतं…’ असा टोला अजित पवारांनी रोहित पवारांना लगावला आहे. तसंच, दर्शन घे काकाचं असं म्हणताच काकाच्या पाया पडत अर्थात अजित पवार यांच्यापुढं नतमस्तक होत रोहित पवारांनी वरिष्ठांचा आशीर्वाद घेतला. पण, ‘थोडक्यात वाचला…’ असं म्हणत अजित पवारांनी रोहित पवारांना टोलाही लगावल्याचं पाहायला मिळालं.
सध्या अजितदादा आणि रोहित पवारांची हे भेट चर्चेचा विषय ठरत आहे. यावर आता रोहित पवार म्हणाले कि, ‘माझे ते काका आहेत म्हणून मी पाया पडलो. विचारांमध्ये भिन्नता आहे पण शेवटी जी काही संस्कृती आहे. एक वडिलधारी व्यक्ती आणि माझ्या २०१९ च्या निवडणुकीत त्यांनी मला मदत केली होती. त्यामुळे काका असल्यामुळं शेवटी संस्कृती असल्यामुळं पाया पडणं ही जबाबदारी आहे. ही (कराडची) जी भूमी आहे, तिथं भेदभाव करून चालत नाही, इथं संस्कृती पाळणं महत्त्वाचं आहे आणि आम्ही ती पाळतो’.
